SAY NO TO GEOTHERMAL EXPLORATION IN BULUSAN

Let our voices be heard!

PANIBAG-ONG KALBARYO

Matapos an batingaw na dati
Uya na man an sayo parti
Na maghahatod sin kamunduan
Sa bungto ta na namomot-an.

An pagkuwa san kusog sa irarom san ingod
Diri man nanggad maraot na ipanglingkod
Kun diri siya makapwerhuwesiyo
Sa mayaman na katahukan san ato bungto.

Nagbabagting naman an kampana
San kampanaryo ta na minana
Geothermal Project pag-isipan
Para mailigtas an Bulusan.

BULUSAN KO NA NAMOMOT-AN

Bulusan ko na namomot-an

Sa pagmasid ko sa imo kagayunan

Minabulos an ako kaugmahan

Orgolyo an ako namamatean.

Pero kun ikaw pinagkukurihan

Inbabasang basang san mga makakinab-an

Luha ko minabulos san daghan

Dobdob ko minasiok sa kamunduan.

Bulusan ko na namomot-an

Patawad kay ikaw binayaan

Sa saimo ako nagmaw-ot na mauli man

Ano pa kaya an maaabutan?

BUNGKARAS NA KITA ULI

Buhay na naman an kampana
San Kampanaryo ta na tinuya-tuya
Bungkaras Bulusan,
An mga tawo na pinag-iiristuryahan
Sira pa man gihapon an makapangyarihan.

Bungkaras, Bulusan,
Bongto ko na kinadakuan.
Bagtingon an Kampana
Na an mga tawo makamangno na.

Nano Na Kita?

Kumusta na daw an Bulusan?
Nano na an ato mga paghinguha?
Nalimutan na nato an ato pinaglalaban?
Haen na an Kampanaryo?
Yadto man gihapon sa likuran,
Sa PILIW san gasolinahan?
Haen na si Bastes?
Haen na si Buising?
Nangkalayas na?
Nawara na sira, dara-dara an kabahinan.
Aw sin-o pa man gihapon dun?
Sira pa man gihapon?
Aw naba?

Mahadok kita sa Dios,
Mahadok kita san pagbasang-basang
Sa templo Niyang mahal.
Bag-o na mga tawo na nakaingkud dun
Reparoha man tabi an dianison
Na kasaysayan san ato bungto.

Balik KAMPANARYO si Toti

Mabuhay ka TOTI.

Syo ka sa mga beterano na Bulusanon, Naruyagon daw ako na nabalitaan ko na nakabalik ka na sa pagtugtog san kampana ta. Nabalitaan ko ini sa Bungkaras Bulusan through Rene Fulleros.

PIRMA NA TABI KAMO

No To A Gasoline Station on Punta Diamante, Bulusan, Sorsogon
Target: The Most Rev. Arturo M. Bastes, S.V.D., D.D.
Sponsored by: Abraham G Tan, Bulusan eGroup, BUKLOD

Makisayo sa bungkaras-bulusan. Magpirma tabi para mabati kita san mayad. Isalbar an ato Punta Diamante, Patio nan sin Kampanaryo. Click lang tabi niyo an link sa baba:

http://www.thepetitionsite.com/1/no-to-a-gasoline-station-on-punta-diamante-bulusan-sorsogon

Salamat sa pagmakulog sa ato bungto.